Implimentazzjoni tal-liġi tal-UE

Il-liġi tal-UE u l-applikazzjoni tagħha

Ir-regolamenti u d-deċiżjonijiet isiru vinkolanti awtomatikament fl-UE kollha fid-data tal-applikazzjoni tagħhom. Madankollu, dawn jistgħu jeħtieġu bidliet fil-leġiżlazzjoni nazzjonali, u jistgħu jeħtieġu implimentazzjoni minn aġenziji jew regolaturi nazzjonali.

Id-direttivi min-naħa l-oħra jridu jiġu inkorporati mill-pajjiżi tal-UE fil-leġiżlazzjoni nazzjonali tagħhom.
Kull direttiva fiha data ta’ skadenza sa meta l-pajjiżi tal-UE għandhom jinkorporaw id-dispożizzjonijiet tagħha fil-leġiżlazzjoni nazzjonali tagħhom u jinfurmaw lill-Kummissjoni dwar dan.

Tista’ ssir taf aktar billi żżur it-taqsima ddedikata dwar Tipi ta’ liġijiet tal-UE

Il-pajjiżi tal-UE jimplimentaw u l-Kummissjoni tappoġġja

L-Istati Membri għandhom rwol ewlieni biex jiżguraw li l-liġi tal-UE tiġi implimentata b’mod korrett u f’waqtu. Dan hu essenzjali biex in-nies u n-negozji jibbenefikaw bl-aħjar mod minn regoli maqbula b’mod komuni.

Il-Kummissjoni tappoġġja dan billi tipprovdi informazzjoni online, torganizza laqgħat tal-gruppi ta’ esperti u tabbozza strateġiji ta’ implimentazzjoni u dokumenti ta’ gwida (pereżempju fil-forma ta’ “Mistoqsijiet Frekwenti” ppubblikati online). Linji gwida maħruġa mill-Kummissjoni jakkumpanjaw lill-Istati Membri fil-proċess ta’ traspożizzjoni għad-direttivi u l-applikazzjoni tar-regolamenti, li normalment jibdew eżatt wara l-adozzjoni ta’ att.

Monitoraġġ mill-Kummissjoni

Il-Kummissjoni hi responsabbli biex tiżgura li l-pajjiżi kollha tal-UE japplikaw b’mod korrett il-liġi tal-UE. F’dan ir-rwol, il-Kummissjoni hi msemmija bħala l-“gwardjan tat-trattati”.

Għalhekk, il-Kummissjoni tieħu azzjoni jekk xi pajjiż tal-UE:

• ma jinkorporax kompletament direttiva fil-liġi nazzjonali tiegħu sad-data ta’ skadenza stabbilita
• ma jkunx applika b’mod korrett il-liġi tal-UE

Il-Komunikazzjoni tal-2016 Il-liġi tal-UE: Riżultati aħjar permezz ta’ applikazzjoni aħjar tispjega kif il-Kummissjoni tiżgura l-applikazzjoni, l-implimentazzjoni u l-infurzar tal-liġi tal-UE għall-benefiċċju taċ-ċittadini, tal-konsumaturi u tan-negozji. Hi tistabbilixxi approċċ strateġiku u prijoritajiet għall-azzjoni ta’ infurzar tal-Kummissjoni.

Il-Komunikazzjoni tal-2022 L-infurzar tal-liġi għal Ewropa li tagħti riżultati tippreżenta l-varjetà ta’ għodod li l-Kummissjoni tuża biex tiżgura li l-liġi tal-UE tiġi applikata kif suppost fil-każijiet kollha biex tilħaq l-objettiv ewlieni tagħha: li n-nies u n-negozji jibbenefikaw mir-regoli maqbula b’mod komuni fl-UE kollha, malajr kemm jista’ jkun. Mill-prevenzjoni għas-sanzjonijiet, il-komunikazzjoni tistabbilixxi kif il-Kummissjoni approfondixxiet u żviluppat il-ħidma tagħha fuq l-infurzar, biex tiżgura li d-drittijiet tal-Ewropej jiġu rispettati b’mod ugwali, irrispettivament minn fejn jgħixu fl-UE.

Regolamentazzjoni aħjar: għaliex u kif

Direttivi ta’ traspożizzjoni

Id-Direttivi jeħtieġ li jiġu inkorporati fil-leġiżlazzjoni nazzjonali tal-Istati Membri. Kull direttiva fiha data ta’ skadenza għat-traspożizzjoni. Sa dik id-data l-pajjiżi tal-UE jridu jibagħtu lill-Kummissjoni t-test tal-miżuri ta’ implimentazzjoni nazzjonali, li fihom id-dispożizzjonijiet ta’ din id-direttiva fil-leġiżlazzjoni tagħhom. 

Id-dewmien fit-traspożizzjoni tal-liġi tal-Unjoni jtellef liċ-ċittadini u n-negozji milli jgawdu l-benefiċċji tal-liġijiet, joħloq inċertezza dwar liema regoli japplikaw u jaffettwa b’mod negattiv il-funzjonament tas-suq intern tal-UE.

Miżuri nazzjonali ta’ implimentazzjoni – kif tista’ ssibhom fil-EUR-Lex

Il-Kummissjoni tivverifika jekk dawn il-miżuri nazzjonali ta’ traspożizzjoni humiex kompluti u jekk jissodisfawx l-objettivi stabbiliti mid-direttiva.

Jekk dan ma jkunx il-każ, il-Kummissjoni tiftaħ proċedura ta’ ksur għal “nuqqas ta’ komunikazzjoni”. Il-Kummissjoni tista’ wkoll tagħti bidu għal proċedura ta’ ksur f’każ ta’ traspożizzjoni inkorretta tad-direttivi.

Il-Kummissjoni tinvestiga

F’xi każijiet, fejn il-Kummissjoni tidentifika ksur possibbli tal-liġi tal-UE, tista’ tiddeċiedi li tuża proċess ta’ qabel il-ksur, magħruf bħala EU Pilot, minflok il-proċedura ta’ ksur.

Dan hu għodda li tista’ tintuża fejn x’aktarx twassal għal konformità aktar rapida minn proċedura formali ta’ ksur. Dan jippermetti lill-Kummissjoni ssolvi numru ta’ każijiet mingħajr il-ħtieġa li tgħaddi għal proċedura ta’ ksur. Dan jista’ jkun il-każ, pereżempju, jekk il-kwistjonijiet ikkonċernati jkunu ta’ natura teknika. Jista’ jkun utli wkoll f’każijiet li fihom il-Kummissjoni tixtieq tiġbor informazzjoni fattwali jew legali meħtieġa sabiex twettaq il-valutazzjoni tagħha. Ma jintużax meta l-ksur tad-dritt tal-UE jkun ipprovat sew, ovvju jew awtorikonoxxut, u lanqas ma jintuża għal kwistjonijiet aktar sensittivi li fihom id-diskussjonijiet fil-livell tekniku x’aktarx iwasslu għal eżitu b’suċċess.

Meta l-pajjiżi jonqsu milli japplikaw il-liġi tal-UE

Jekk l-awtoritajiet nazzjonali ma jimplimentawx kif suppost il-liġijiet tal-UE, il-Kummissjoni tista’ tniedi proċedura formali ta’ ksur kontra l-pajjiż inkwistjoni. Jekk il-kwistjoni xorta ma tkunx riżolta, il-Kummissjoni tista’ eventwalment tirreferi l-każ lill-Qorti tal-Ġustizzja tal-Unjoni Ewropea. F’xi każijiet, il-Kummissjoni tista’ titlob lill-Qorti biex timponi sanzjonijiet finanzjarji fuq l-Istat Membru kkonċernat.

L-għan ewlieni ta’ proċedura ta’ ksur hu li jiġi żgurat li l-Istati Membri japplikaw il-liġi tal-UE fl-interess ġenerali. Għalhekk huma jiffukaw fuq kwistjonijiet sistemiċi li jaffettwaw ħafna nies jew negozji. F’każijiet iżolati ta’ applikazzjoni ħażina possibbli tal-liġi tal-UE, il-kwistjonijiet jistgħu jiġu indirizzati l-aħjar permezz tas-sistema nazzjonali ta’ rimedju.

Proċedura ta’ ksur u sanzjonijiet finanzjarji